ភ្នំពេញ ៖ តុលាការកំពូល និងមហាអយ្យការអមតុលាការកំពូល បានចេញសេចក្តីសម្រាប់បង្គាប់ឱ្យមន្ត្រីទាំងអស់រួមមាន ចៅក្រម ព្រះរាជអាជ្ញា ក្រឡាបញ្ជី និង មន្ត្រីនៃអគ្គលេខាធិការដ្ឋានរដ្ឋបាលតុលាការកំពូល ត្រូវវិលមកចូលបម្រើការងារជាធម្មតាឡើងវិញ នៅស្ថាប័នតុលាការកំពូល និងមហាអយ្យការអមតុលាការកំពូល ចាប់ពីថ្ងៃទី០៦ ខែឧសភា ឆ្នាំ២០២១តទៅ។

លោកកិត្តិនីតិកោសលបណ្ឌិត ឌិត មុន្នី ប្រធានតុលាការកំពូលក៏បានប្រកាសអនុញ្ញាតចំពោះមន្ត្រីតុលាការកំពូល និងមហាអយ្យការអមតុលាការកំពូល ដែលស្ថិតនៅក្នុង ភូមិសាស្ត្រ បិទខ្ទប់ដែលសម្រេចដោយ គណៈអភិបាលរាជធានីភ្នំពេញ និង គណៈអភិបាលខេត្តកណ្តាល ឱ្យបំពេញការងារពីចម្ងាយ ឬតាមរយៈប្រព័ន្ធអនឡាញ រហូតដល់មានសេចក្តីសម្រេចសារជាថ្មី។

ជាមួយគ្នានោះ លោកកិត្តិនីតិកោសលបណ្ឌិត ឌិត មុន្នី បានប្រកាសដាក់ឱ្យដំណើរការឡើងវិញនូវកម្មវិធីសវនាការ រឿងព្រហ្មទណ្ឌ និងរឿងរដ្ឋប្បវេណចាប់ពីថ្ងៃទី០៦ ខែឧសភា ឆ្នាំ២០២១ផងដែរ៕